Uprkos lošem vremenu u Petnjici, kiši i neuobičajenoj hladnoći za ovo doba godine dvadesetak bihorskih mladića je ipak odlučilo da održi prvomajsku tradiciju i dan provedu u prirodi.
Iako na petnjičkim ulicama nije bilo radnika niti nekog drugog obilježavanja praznika rada, bivši i sadašnji srednjoškolci su dan iskoristili za druženje pored roštilja.
,,Danas smo napravili dogovor da dan provedemo u prirodi, uprkos kiši. Bilo nas je oko 20-ak, a sigurno bi nas bilo više da nas je vrijeme poslužilo. Bili smo na katunu ,,Pločnik”, a kasnije smo otišli i do ,,Crnog vrela”. Napravili smo kao neku manju džipijadu. Roštilj smo sami pripremali i finansirali. Uživali smo uprkos lošem vremenu”, kazao je jedan od prvomajskih entuzijasta.
On je dodao da se društvo okupilo na prvomajski urank kako bi se družili i uživali u slobodnom vremenu.
“Ne ide se u školu danas, hvala Bogu. Možda ne proslavljamo ovaj dan kako bi trebalo, ali nama je svakako bilo lijepo i okupili smo se ovdje sa društvom. Nemamo kada da se vidimo zbog škole i svih tih obaveza i došao je taj praznik kada se svi okupljamo, pravimo roštilj i uživamo” kazao je jedan od momaka i organizatora.
ALMINA ŠABOTIĆ
